សម្តេចអគ្គមហាសេនាបតីតេជោ ហ៊ុន សែន
ដាក់ចេញអនុសាសន៍សម្រាប់ការអភិវឌ្ឍយុវជនកម្ពុជា
ទី១-ត្រូវយកចិត្ដទុកដាក់ពង្រឹងក្បាល
ម៉ាស៊ីនដឹកនាំយុវជនគ្រប់ថ្នាក់ ពិសេសថ្នាក់មូលដ្ឋាន
ពីព្រោះថ្នាក់មូលដ្ឋាននេះហើយ
ជាអ្នកអនុវត្ដផ្ទាល់រាល់សេចក្ដីសម្រេចចិត្ដនានា
របស់សហភាពសហព័ន្ធយុវជនថ្នាក់លើ ពិសេសជាអ្នកអប់រំ គ្រប់គ្រង
និងដឹកនាំដោយផ្ទាល់នូវចលនាយុវជននៅមូលដ្ឋានឃុំ សង្កាត់ គ្រឹះស្ថាន
សិក្សា និងអង្គភាពនានា។ សម្តេចតេជោបញ្ជាក់ថា សហភាពសហព័ន្ធយុវជនខ្លាំង
ឬខ្សោយ គឺអាស្រ័យដោយថ្នាក់មូលដ្ឋាននេះហើយ។
ក្នុងនោះគណៈកម្មាធិការកណ្ដាលសហភាពសហព័ន្ធយុវជនកម្ពុជាត្រូវ
គិតគូរចំពោះមុខការបណ្ដុះបណ្ដាលសមត្ថភាព របៀបរបបការងារ និងនីតិវិធី
នៃការបំផុសចលនាយុវជនជូនថ្នាក់ដឹកនាំសហភាពសហព័ន្ធយុវជនកម្ពុជានៅ
មូលដ្ឋានឱ្យបានល្អប្រសើរ នោះទើបយើងធានាបាននូវប្រសិទ្ធភាពការងារ។
ប្រការសំខាន់ គឺថ្នាក់ដឹកនាំ សមាជិក
និងយុវជនយុវនារីម្នាក់ៗត្រូវប្រកាន់ខ្ជាប់តួនាទី
និងភារកិច្ចរបស់ខ្លួន។ ដោយឡែកក្រៅអំពីការពង្រឹងសមត្ថភាព
និងការបណ្ដុះបណ្ដាលសហភាពសហព័ន្ធយុវជនកម្ពុជា
ត្រូវបង្កើនចំណងសាមគ្គីភាពផ្ទៃក្នុងឱ្យបានល្អប្រសើរ
និងចាត់ទុកកិច្ចការនេះជាមធ្យោបាយដ៏សំខាន់
សម្រាប់ការធ្វើដំណើរទៅមុខប្រកបដោយជោគជ័យ
ពោលគឺការធ្វើដំណើររួមជាមួយគ្នាប្រកបដោយភាពរលូន
និងស៊ីសង្វាក់ទៅតាមគោលការណ៍ភាគតិចគោរពភាគច្រើន ដែលក្នុងនោះ
ភាគតិចត្រូវបានយកចិត្ដទុកដាក់ និងគិតគូរ។
ទន្ទឹមនោះត្រូវគោរពប្រតិបត្ដិឱ្យបានខ្ជាប់ខ្ជួនតាមស្មារតីនៃ
លក្ខន្ដិកៈ និង
បទបញ្ជាផ្ទៃក្នុងរបស់ខ្លួនឱ្យបានល្អប្រសើរសំដៅប្រមូលផ្ដុំ
កម្លាំង អនុវត្ដទិសដៅការងារយុវជនឆ្នាំ២០១៣-២០១៨។
ទី២-គប្បីខិតខំដើរតួនាទីសម្របសម្រួល
ជាមួយអង្គការសង្គមស៊ីវិលដទៃទៀត
ដែលកំពុងធ្វើសកម្មភាពក្នុងចលនាយុវជន
ដើម្បីប្រមូលផ្ដុំកម្លាំងអនុវត្ដរួមគ្នានូវគោលនយោបាយជាតិស្ដីពី
ការអភិវឌ្ឍយុវជនកម្ពុជា និងទិសដៅការងារយុវជនឆ្នាំ២០១៣-២០១៨
របស់ខ្លួនឱ្យទទួលបានលទ្ធផលល្អប្រសើរ។
ទី៣-ត្រូវចូលរួមអនុវត្ដគោលនយោបាយនានា
របស់រាជរដ្ឋាភិបាល
ដោយត្រូវខិតខំផ្សព្វផ្សាយឱ្យបានទូលំទូលាយក្នុងស្រទាប់យុវជន
ឱ្យបានជ្រួតជ្រាបអំពីគោលនយោបាយជាតិទាំងនេះ
ហើយក៏ត្រូវឈ្លាសវៃក្នុងការប្រមូលផ្ដុំធនធានមនុស្ស
និងសម្ភារៈពីគ្រប់ស្ថាប័នពាក់ព័ន្ធសំដៅធ្វើឱ្យសហភាពសហព័ន្ធយុវជន
កម្ពុជាជាស្នូលគ្រឹះដ៏រឹងមាំនៃចលនាយុវជន
នៃព្រះរាជាណាចក្រកម្ពុជា។
ទី៤-គប្បីយកចិត្ដទុកលើការងារ
បណ្ដុះបណ្ដាលសមត្ថភាពយុវជន ឱ្យឆ្លើយតបបានទៅនឹង
តម្រូវការនៃទីផ្សារពលកម្ម ឬបង្កើតការងារដោយខ្លួនឯង
និងរៀបចំជាកន្លែងប្រមូលផ្ដុំ ចែកចាយព័ត៌មានសំខាន់ៗ
សម្រាប់សេចក្ដីត្រូវការរបស់យុវជននៅទូទាំងប្រទេស និងម្យ៉ាងទៀត
គឺឆ្លើយតបទៅនឹងការធ្វើសមាហរណកម្មរបស់កម្ពុជានៅក្នុងតំបន់
និងពិភពលោក។ ក្នុងនោះ
ត្រូវជួយធ្វើឱ្យយុវជនមានសមត្ថភាពក្នុងការវិភាគ
ការកំណត់ទិសដៅផ្ទាល់ខ្លួន និងវិជ្ជាជីវៈ
ការចេះគោរពខ្លួនឯងមានទំនុកចិត្ដ និងមានការលើកទឹកចិត្ដ
មានសមត្ថភាពបំពេញការងារ
និងមានសមត្ថភាពដឹកនាំការបំពេញការងារផ្សេងៗ។
ចំណុចទាំងនេះសម្តេចតេជោបានមាន
ប្រសាសន៍បញ្ជាក់ថា
នឹងនាំទៅដល់ការលើកកម្ពស់សមត្ថភាពយុវជនយើងក្នុងដំណើរការ
សមាហរណកម្មក្នុងតំបន់។
ជាក់ស្ដែងអាស៊ានបានព្រមព្រៀងរៀបចំបង្កើតយុវជនអាស៊ានសម្រាប់ភាពជា
អ្នកដឹកនាំនៅក្នុងតំបន់ តាមរយៈការជំរុញអនុវត្ដនូវកម្មវិធីនានា
ដូចជា កម្មវិធីយុវជនអនាគតអាស៊ាន
កម្មវិធីផ្លាស់ប្ដូរសហគ្រិនវ័យក្មេងអាស៊ាន-ចិន
កម្មវិធីផ្លាស់ប្ដូរនិស្សិត និងយុវជនជប៉ុន-អាស៊ី បូព៌ា
កម្មវិធីដំណើរកំសាន្ដយុវជនអាស៊ាន និងវេទិកាយុវជនអាស៊ានជាដើម។
កិច្ចការទាំងអស់នេះ
យើងចាំបាច់ត្រូវបន្ដស្វែងយល់ឱ្យបានស៊ីជម្រៅគ្រប់ជ្រុងជ្រោយ
និងត្រូវបន្ដពង្រឹង និងពង្រីកដើម្បីឧត្ដមផលប្រយោជន៍របស់យុវជនយើង
និងយុវជនអាស៊ានទាំងមូល។
ទី៥-ត្រូវយកចិត្ដទុកដាក់រៀបចំផែនការ
សកម្មភាពឱ្យបានសមស្របតាមស្ថានភាព របស់ ប្រទេសជាតិផង
តាមសភាពការណ៍របស់យុវជនគ្រប់មុខសញ្ញាផង ពិសេសរៀបចំគោលការណ៍
វាយតម្លៃតាមលក្ខណៈវិនិច្ឆ័យច្បាស់លាស់
និងធ្វើការបូកសរុបវាយតម្លៃការអនុវត្ដចលនានេះ
ឱ្យបានជាប្រចាំនៅតាមថ្នាក់រាជធានី-ខេត្ដ។ ធ្វើដូច្នេះ
មិនត្រឹមតែចូលរួមពង្រីកការលើកកម្ពស់
សមត្ថភាពយុវជនឆ្នើមជូនប្រទេសជាតិបានច្រើនប៉ុណ្ណោះទេ
ប៉ុន្ដែថែមទាំងរួមចំណែកកាត់
បន្ថយរាល់ភាពអសកម្មក្នុងជួរយុវជនទៀតផង។
ទី៦-សហភាពសហព័ន្ធយុវជនកម្ពុជា
គ្រប់ថ្នាក់ត្រូវចុះជាប់ជាមួយមហាជនយុវជនឱ្យបានជា ប្រចាំ
ដើម្បីស្ដាប់យុវជនបញ្ចេញមតិជាជាងនិយាយច្រើនឱ្យយុវជនស្ដាប់
និងស្វែងយល់ពីទុក្ខ លំបាក និងតម្រូវការចាំបាច់នានា
ក្នុងជីវភាពរស់នៅរបស់ពួកគេ
ដើម្បីបានជួយដោះស្រាយកង្វល់ពួកគេទៅតាមលទ្ធភាពបានទាន់ពេលវេលា
ក៏ដូចជាបានចូលរួមចំណែកផ្ដល់នូវធាតុចូលបន្ថែម
ឬអនុសាសន៍ផ្សេងៗដល់រាជរដ្ឋាភិបាល ក្នុងការរៀបចំគោលនយោបាយនានា
ដែលមានការពាក់ព័ន្ធនឹងយុវជន។ ជារួមយើងមានមហាជននៅជាមួយយើង
គាំទ្រយើង! យើងនឹងពិតជាទទួលបានជ័យជំនះជានិច្ច។
ទន្ទឹមនេះចាំបាច់ណាស់យើងត្រូវជំរុញយុវជនឱ្យស្រឡាញ់ឧត្ដមគតិ
និងភាពត្រឹមត្រូវ ស្រឡាញ់ចំណេះដឹង និងជំនាញ មានសុច្ចរិតភាព និង
សមត្ថភាពអាចគ្រប់គ្រងខ្លួនឯង និងខិតខំប្រឹងប្រែងធ្វើការងារ
ដើម្បីបង្ហាញនូវទេពកោសល្យ និងតម្លៃរបស់ខ្លួននៅក្នុងឆាកជីវិត។
ក្នុងនោះ ត្រូវធ្វើឱ្យយុវជនចេះស្រឡាញ់តម្លៃនៃការអត់ឱន ការគោរព
និងការយល់ចិត្ដគ្នាទៅវិញទៅមក
ដែលប្រការនេះនឹងធ្វើឱ្យយុវជនមានអាកប្បកិរិយាគួរសម
និងចេះជួយគ្នាទៅវិញទៅមក។
ទី៧-ឆ្លៀតឱកាសដ៏ល្អប្រសើរនេះ
សូមយុវជនកម្ពុជាគ្រប់រូបបង្កើនការគិតគូរពីអនាគតខ្លួន
ដោយប្រកាន់ខ្ជាប់ខ្ជួនថា សំណាង
ឬវាសនាផ្ទាល់ខ្លួនពិតជាខ្លួនយើងម្នាក់ៗនេះហើយជាអ្នកតាក់តែងឡើង
ដោយផ្ទាល់។
រាជរដ្ឋាភិបាលបានបណ្ដុះនូវថ្នាលមួយសម្រាប់យុវជនយើងឱ្យដុះលូត
លាស់ហើយ ដូច្នេះក្មួយៗត្រូវប្រកាន់ភ្ជាប់នូវគុណធម៌ សីលធម៌ល្អ
និងផ្សារភ្ជាប់ខ្លួនទៅនឹងការសិក្សាទាំងវប្បធម៌ទូទៅ ទាំងបច្ចេកទេស
និងជំនាញជាក់លាក់ ដើម្បីធានាបាននូវជីវភាពសមរម្យ ដោយឈរលើទស្សនៈ
ពលរដ្ឋសម្បូណ៌ជំនាញប្រទសជាតិមានការរីកចម្រើន ។
សូមក្មួយៗកុំប្រើប្រាស់ពេលវេលាដ៏មានតម្លៃរបស់ខ្លួនទៅសេព
គ្រឿងញៀន គ្រឿងស្រវឹង ឬប្រព្រឹត្ដអំពើអបាយមុខផ្សេងៗ
ដែលនាំប៉ះពាល់ដល់សុខភាព និងទ្រព្យសម្បត្ដិផ្ទាល់ខ្លួន គ្រួសារ
និងសង្គមទៀតផង។
ក្នុងនោះត្រូវយកចិត្ដទុកដាក់ជាប្រចាំក្នុងការថែរក្សាការពារសុខ
ភាពឱ្យបានល្អ ដោយត្រូវហូបស្អាត ផឹកស្អាត និងរស់នៅស្អាត
ដើម្បីចៀសវាងនូវជំងឺឆ្លងផ្សេងៗ។ ក្មួយៗត្រូវដឹងថា
អនាគតរបស់ប្រទេសជាតិស្ថិតនៅក្នុងដៃយុវជន
ប្រទេសជាតិត្រូវការយុវជនដែលមានឆន្ទៈ សមត្ថភាព បទពិសោធ
និងចរិយាធម៌ដើម្បីបន្ដចីរភាពនៃការអភិវឌ្ឍមាតុភូមិ។
សម្តេចតេជោនាយករដ្ឋមន្ត្រីមានប្រសាសន៍ថា
ខ្ញុំមានជំនឿយ៉ាងមុតមាំថា យុវជនកម្ពុជា
នឹងបន្ដបោះជំហានទៅមុខប្រកបដោយសុទិដ្ឋិនិយម វឌ្ឍនភាព
និងវិបុលភាពនៅលើមូលដ្ឋាន កាន់តែធំទូលំទូលាយ
គ្រប់ជ្រុងជ្រោយប្រកបដោយប្រសិទ្ធភាព និងមានលក្ខណៈកាន់តែអំណោយផល
សម្រាប់ភាពសុខដុមនៃសង្គមជាតិ និងការអភិវឌ្ឍប្រកបដោយចីរភាព។
ប្រភព អង្គភាពព័ត៌មាន និងប្រតិកម្មរហ័ស http://www.pressocm.gov.kh
No comments:
Post a Comment